കുവൈത്തിലെ ഉച്ചവിശ്രമ നിയന്ത്രണം അവസാനത്തിലേക്ക്; ഇതുവരെ 64 ലംഘനങ്ങൾ
midday rule in kuwait കനത്ത വേനൽച്ചൂട് കണക്കിലെടുത്ത് രാജ്യത്ത് ജൂൺ മുതൽ ഏർപ്പെടുത്തിയ മധ്യാഹ്ന തൊഴിൽ നിരോധന നിയമം ഓഗസ്റ്റ് 31-ന് അവസാനിക്കും. തൊഴിലാളികളെ തീവ്രമായ ചൂടിൽ നിന്ന് സംരക്ഷിക്കുക എന്ന ലക്ഷ്യത്തോടെയാണ് ഈ നിയന്ത്രണം നടപ്പാക്കിയത്. ജൂൺ 1 മുതൽ ഓഗസ്റ്റ് 31 വരെ രാവിലെ 11നും വൈകീട്ട് 4നും ഇടയിലുള്ള സമയത്ത് നേരിട്ട് സൂര്യപ്രകാശം ഏൽക്കുന്ന പുറം ജോലികൾ ചെയ്യുന്നതിന് വിലക്കുണ്ടായിരുന്നു.
ഈ വർഷം ഇതുവരെ 64 നിയമലംഘനങ്ങൾ കണ്ടെത്തിയതായി പബ്ലിക് അതോറിറ്റി ഫോർ മാൻപവർ അറിയിച്ചു. ജൂലൈ മാസത്തിൽ മാത്രം 31 സ്ഥാപനങ്ങളാണ് നിയമം ലംഘിച്ചത്. കഴിഞ്ഞ രണ്ട് മാസത്തിനിടെ, ഇൻസ്പെക്ടർമാർ 102 തൊഴിലിടങ്ങളിൽ പരിശോധന നടത്തി. കൂടാതെ, ഹോട്ട് ലൈൻ വഴി 26 പരാതികളും ലഭിച്ചു.
നേരത്തെ നിയമലംഘനം നടത്തിയ കമ്പനികൾ തുടർ പരിശോധനകളിൽ നിയമം പാലിക്കുന്നതായി കണ്ടെത്തി. ആവർത്തിച്ചുള്ള നിയമലംഘനങ്ങൾ ഈ വർഷം രേഖപ്പെടുത്തിയിട്ടില്ലെന്നും അതോറിറ്റി വ്യക്തമാക്കി.
നിർമ്മാണ മേഖല ഉൾപ്പെടെയുള്ള തൊഴിലിടങ്ങളിൽ നിയമം പാലിക്കുന്നുണ്ടെന്ന് ഉറപ്പാക്കാൻ ഫീൽഡ് ഇൻസ്പെക്ഷൻ ടീമുകൾ പരിശോധന നടത്തിയിരുന്നു. 2015-ലാണ് രാജ്യത്ത് ആദ്യമായി ഉച്ചവിശ്രമ നിയമം അവതരിപ്പിച്ചത്.
കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/JwjTxtP7SMiEbr9IDkTJiK?mode=ems_copy_c
Comments (0)