രാജ്യത്ത് നിയന്ത്രിത പദാർത്ഥമായ ലിറിക്ക ഇറക്കുമതി ചെയ്യുകയും പ്രചരിപ്പിക്കുകയും ചെയ്ത അന്താരാഷ്ട്ര മയക്കുമരുന്ന് ശൃംഖലയെ തകർത്ത് ആഭ്യന്തര മന്ത്രാലയം. ക്രിമിനൽ സെക്യൂരിറ്റി സെക്ടറിന് കീഴിലുള്ള ജനറൽ ഡിപ്പാർട്ട്‌മെൻ്റ് ഫോർ ഡ്രഗ് കൺട്രോളിന്റെ നേതൃത്വത്തിൽ നടന്ന അതീവ രഹസ്യ നീക്കത്തിൽ, ഏകദേശം 800,000 ലിറിക്ക കാപ്സ്യൂളുകളും വലിയ അളവിലുള്ള ലിറിക്ക പൗഡറും പിടിച്ചെടുത്തു. കണ്ടുകെട്ടിയ വസ്തുക്കൾക്ക് വൻ വിലമതിപ്പുണ്ടെന്ന് ആഭ്യന്തര മന്ത്രാലയം അറിയിച്ചു.

ജയിലിൽ നിന്ന് പ്രവർത്തിച്ച മുഖ്യപ്രതി

കുവൈത്ത് സെൻട്രൽ ജയിലിൽ കഴിയുന്നയാളാണ് ഈ മയക്കുമരുന്ന് റാക്കറ്റിന്റെ മുഖ്യസൂത്രധാരൻ. ഇയാൾ നിരവധി മയക്കുമരുന്ന് കടത്ത് കേസുകളിൽ ഉൾപ്പെട്ടയാളും പലതവണ ശിക്ഷിക്കപ്പെട്ടിട്ടുള്ളയാളുമാണ്. കബ്ദിലെ ലഹരി ഇടപാട് കേന്ദ്രത്തിൽ അധികൃതർ നടത്തിയ പരിശോധനയിലാണ് ഈ കേസിന്റെ ചുരുളഴിഞ്ഞത്.

ഓപ്പറേഷൻ ആരംഭിച്ചത് ഇങ്ങനെ

കാപ്സ്യൂളുകൾ വിൽക്കുന്ന ഒരാളെ അന്വേഷണ ഉദ്യോഗസ്ഥർ പിടികൂടി. തുടർന്ന് നടത്തിയ പരിശോധനയിൽ വലിയ അളവിൽ ലിറിക്ക കാപ്സ്യൂളുകളും പൊടിയും, കൂടാതെ ഇവ പാക്ക് ചെയ്യാനും വിതരണം ചെയ്യാനും ഉപയോഗിക്കുന്ന ഉപകരണങ്ങളും കണ്ടെത്തി.

കൂടുതൽ അന്വേഷണത്തിൽ, ഒരു ഏഷ്യൻ രാജ്യത്ത് നിന്ന് വിമാനമാർഗ്ഗം വലിയ തോതിൽ മയക്കുമരുന്ന് എത്തിക്കാൻ തടവുകാരൻ പദ്ധതിയിട്ടതായി കണ്ടെത്തി. ഇതുസംബന്ധിച്ച് കസ്റ്റംസ് ഉദ്യോഗസ്ഥർക്ക് മുന്നറിയിപ്പ് ലഭിച്ചതോടെ കാർഗോ ടെർമിനലിൽ നടത്തിയ പരിശോധനയിൽ ലിറിക്ക കാപ്സ്യൂളുകൾ നിറച്ച ഏഴ് വലിയ പെട്ടികൾ കണ്ടെത്തുകയായിരുന്നു.

കർശന നടപടിയുമായി ആഭ്യന്തര മന്ത്രാലയം

രാജ്യത്തേക്ക് മയക്കുമരുന്ന് കടത്താനും വിൽക്കാനും ശ്രമിക്കുന്നവർക്കെതിരെ ശക്തമായ നടപടികൾ സ്വീകരിക്കുമെന്ന് ആഭ്യന്തര മന്ത്രാലയം വ്യക്തമാക്കി. മയക്കുമരുന്ന് കടത്ത്, വിൽപന, ഉപയോഗം എന്നിവക്കെതിരെ അതീവ ജാഗ്രത പുലർത്തുമെന്നും മന്ത്രാലയം കൂട്ടിച്ചേർത്തു.

കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/LXkAQWFENhKJ0MX7QxTdN5?mode=ac_t