കുവൈത്തിൽ 24 മണിക്കൂറിനിടെ 750 ട്രാഫിക് കേസുകൾ: ഓവർടേക്കിങ്ങും ഗതാഗത തടസ്സവും പ്രധാന നിയമലംഘനങ്ങൾ
കുവൈത്ത് സിറ്റി: ട്രാഫിക് നിയമങ്ങൾ ലംഘിക്കുന്ന ഡ്രൈവർമാർക്കെതിരെ ജനറൽ ട്രാഫിക് ഡിപ്പാർട്ട്‌മെൻ്റ് (General Traffic Department) ശക്തമായ നടപടിയുമായി മുന്നോട്ട്. ഒക്ടോബർ ഒന്നിന് 24 മണിക്കൂറിനിടെ മാത്രം 750 ഗതാഗത നിയമലംഘനങ്ങളാണ് കുവൈത്തിൽ രേഖപ്പെടുത്തിയത്.
ശരിയായ രീതിയിൽ അല്ലാത്ത ഓവർടേക്കിങ്, ഇന്റർസെക്ഷനുകളിലും ട്രാഫിക് ലൈറ്റുകളിലും നിർത്തിയിട്ട വാഹനങ്ങളെ മറികടക്കാൻ ശ്രമിക്കൽ, മനഃപൂർവം ഗതാഗത തടസ്സമുണ്ടാക്കൽ തുടങ്ങിയ ഗുരുതരമായ നിയമലംഘനങ്ങൾക്കാണ് പിഴ ചുമത്തിയത്. ഗതാഗതക്കുരുക്കിന് കാരണമാകുന്ന ഇത്തരം നിയമലംഘനങ്ങൾ ഡിപ്പാർട്ട്‌മെൻ്റ് നൂതനമായ ട്രാഫിക് ക്യാമറകളിലൂടെയും നിയന്ത്രണ സ്ക്രീനുകളിലൂടെയും സൂക്ഷ്മമായി നിരീക്ഷിച്ചിരുന്നു.
എല്ലാ നിയമലംഘനങ്ങളും സ്മാർട്ട് നിരീക്ഷണ ക്യാമറകൾ ഉപയോഗിച്ച് രേഖപ്പെടുത്തുന്നതിനാൽ നിയമലംഘകർക്ക് പിഴയിൽ നിന്ന് ഒഴിവാകാൻ സാധിക്കില്ല. ഈ നിരീക്ഷണ സംവിധാനം മൊബൈൽ പോലീസ് പട്രോളുകളുമായി സംയോജിപ്പിച്ചാണ് പ്രവർത്തിക്കുന്നത്. നിയമലംഘനങ്ങൾ രേഖപ്പെടുത്തി പരിശോധിച്ച് ഉറപ്പാക്കിയ ശേഷം സാഹെൽ (Sahel) ആപ്പ് വഴി വാഹന ഉടമകളെ വിവരമറിയിക്കും.
പിഴവുകൾ ഒഴിവാക്കാൻ എല്ലാ നിയമലംഘനങ്ങളും പുനഃപരിശോധനയ്ക്ക് വിധേയമാക്കുന്നുണ്ട്. ഗുരുതരമായ നിയമലംഘനങ്ങളിൽ, ജനറൽ ട്രാഫിക് ഡിപ്പാർട്ട്‌മെൻ്റ് പരിശോധന പൂർത്തിയാകുന്നതുവരെ ഡ്രൈവറുടെ ലൈസൻസ് തടഞ്ഞുവെച്ചേക്കാം എന്നും അധികൃതർ മുന്നറിയിപ്പ് നൽകി.
കുവൈത്തിൽ ‘അൽ-സെർഫ’ എത്തി; സുഹൈൽ സീസണിന് വിട, ഇനി തണുത്ത് വിറയ്ക്കും
കുവൈത്ത് സിറ്റി: കുവൈത്തിലെ സുഹൈൽ സീസണിലെ അവസാന നക്ഷത്രമായ ‘അൽ-സെർഫ’ ഒക്ടോബർ 3-ന് എത്തിയതായി അൽ-അജിരി സയൻ്റിഫിക് സെൻ്റർ അറിയിച്ചു. ശരത്കാലത്തെ നാലാമത്തെ നക്ഷത്രമാണിത്. 13 ദിവസം നീണ്ടുനിൽക്കുന്ന ‘അൽ-സെർഫ’ സീസൺ ഒക്ടോബർ 15-ന് അവസാനിക്കും. ഇതോടെ കുവൈത്തിലെ കാലാവസ്ഥ തണുപ്പിലേക്ക് മാറാനുള്ള ഒരുക്കങ്ങൾ തുടങ്ങുമെന്നാണ് സൂചന.
ഈ കാലയളവിൽ പ്രതീക്ഷിക്കുന്ന കാലാവസ്ഥാ മാറ്റങ്ങൾ:
ചൂട് കുറയും: പകൽ സമയത്തെ ചൂട് നിലനിൽക്കുമെങ്കിലും മൊത്തത്തിലുള്ള ചൂടിൽ ക്രമാനുഗതമായ കുറവ് അനുഭവപ്പെടും.
രാത്രി തണുപ്പ്: രാത്രികാലങ്ങളിൽ തണുപ്പ് അനുഭവപ്പെട്ടു തുടങ്ങും.
ഈർപ്പം കുറയും: അന്തരീക്ഷത്തിലെ ഈർപ്പം ഇല്ലാതാകും.
‘അൽ-സെർഫ’ സീസണിന്റെ മധ്യത്തിൽ പടിഞ്ഞാറ് ദിശയിൽ നിന്ന് മേഘങ്ങൾ പ്രത്യക്ഷപ്പെടാൻ സാധ്യതയുണ്ടെന്ന് അൽ-അജിരി സെൻ്റർ സൂചിപ്പിച്ചു. ഇത് ഒക്ടോബർ 16-ന് പ്രതീക്ഷിക്കുന്ന ‘വസ്‌മ്’ സീസണിന്റെ ആദ്യ സൂചനകളായി കണക്കാക്കപ്പെടുന്നു. ‘വസ്‌മ്’ സീസണിലെ മേഘങ്ങൾക്ക് സമാനമായ രീതിയിലായിരിക്കും ഇവ കാണപ്പെടുക.
കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/JwjTxtP7SMiEbr9IDkTJiK?mode=ems_copy_c
ഗസ ഫ്ലോട്ടില്ലയിലെ കുവൈത്തി യുവാക്കൾ സുരക്ഷിതർ, മോചനത്തിനായി ജോർദാൻ ഇടപെടൽ
ഗാസയിലെ ഇസ്രായേൽ ഉപരോധം ഭേദിച്ച് സഹായമെത്തിക്കാനായി പുറപ്പെട്ട ‘സുമൂദ് ഫ്ലോട്ടില്ല’ സംഘത്തിൽ ഉൾപ്പെട്ട മൂന്ന് കുവൈത്തി യുവാക്കൾ സുരക്ഷിതരാണെന്ന് ജോർദാൻ വിദേശകാര്യ മന്ത്രാലയം സ്ഥിരീകരിച്ചു. അബ്ദുള്ള അൽ-മുതവ, ഖാലിദ് അൽ-അബ്ദുൽജാദർ, ഡോ. മുഹമ്മദ് ജമാൽ എന്നിവരാണ് സംഘത്തിലുള്ളത്.
എന്നാൽ, ഈ കുവൈത്തി പൗരന്മാരെ ഇസ്രായേൽ സൈന്യം ഇതുവരെ വിട്ടയച്ചിട്ടില്ലെന്നും ഇവർ ഇപ്പോഴും തടങ്കലിൽ തന്നെയാണെന്നും മുതിർന്ന നയതന്ത്ര വൃത്തങ്ങളെ ഉദ്ധരിച്ച് അൽ-റായി ദിനപത്രം റിപ്പോർട്ട് ചെയ്തു. ഈ ഫ്ലോട്ടില്ല സംഘത്തിലെ ആരെയും ഇസ്രായേൽ ഇതുവരെ മോചിപ്പിച്ചിട്ടില്ല.
മോചന ശ്രമങ്ങൾ ഊർജിതം:
കുവൈത്തി യുവാക്കളെ വിട്ടുകിട്ടുന്നതിനായി കുവൈത്ത് ഭരണകൂടം എല്ലാ ശ്രമങ്ങളും നടത്തിവരികയാണ്. ഇതിന്റെ ഭാഗമായി ജോർദാനിയൻ വിദേശകാര്യ മന്ത്രിയുമായി നിരന്തരം ബന്ധപ്പെടുന്നുണ്ടെന്ന് അമ്മാനിലെ കുവൈത്ത് സ്ഥാനപതി വ്യക്തമാക്കി.
അതേസമയം, ഇസ്രായേൽ തടവിലുള്ള കുവൈത്തി പൗരന്മാരെ തങ്ങളുടെ സ്വന്തം പൗരന്മാരായി കണക്കാക്കുമെന്നും ആവശ്യമായ എല്ലാ സഹായങ്ങളും നൽകുമെന്നും ജോർദാൻ ഉറപ്പു നൽകി. ഇവരെ സുരക്ഷിതമായി കുവൈത്തിലേക്ക് തിരിച്ചെത്തിക്കുന്നതിന് നയതന്ത്ര മാർഗങ്ങൾ ഉൾപ്പെടെ എല്ലാ സാധ്യതകളും ഉപയോഗിക്കുമെന്നും ജോർദാൻ വിദേശകാര്യ മന്ത്രാലയം അറിയിച്ചു. സ്ഥിതിഗതികൾ സൂക്ഷ്മമായി നിരീക്ഷിച്ചുവരികയാണെന്നും ബന്ധപ്പെട്ട വൃത്തങ്ങൾ വ്യക്തമാക്കി.
കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/JwjTxtP7SMiEbr9IDkTJiK?mode=ems_copy_c
കുവൈത്തിൽ വീട്ടുജോലിക്കാരികളെ വിൽപ്പന നടത്തി; റിക്രൂട്ട്‌മെന്റ് ഓഫീസ് പൂട്ടിച്ചു; പ്രതികൾ പിടിയിൽ
കുവൈത്ത് സിറ്റി: മനുഷ്യക്കടത്ത്, വിസ തട്ടിപ്പ് എന്നിവ നടത്തിയ ഫഹാഹീലിലെ അനധികൃത ആഭ്യന്തര തൊഴിലാളി റിക്രൂട്ട്‌മെന്റ് ഓഫീസ് ക്രിമിനൽ ഇൻവെസ്റ്റിഗേഷൻ ജനറൽ ഡിപ്പാർട്ട്‌മെന്റ് അടച്ചുപൂട്ടി. ആഭ്യന്തര മന്ത്രാലയത്തിന്റെ തുടർച്ചയായ നിയമവിരുദ്ധ തൊഴിൽ സമ്പ്രദായങ്ങൾക്കെതിരായ നടപടിയുടെ ഭാഗമായാണ് ഈ നീക്കം.
ഓഫീസ് വീസകൾ അനധികൃതമായി വിൽക്കുകയും, തൊഴിലാളികളെ താമസിപ്പിക്കുകയും, ചൂഷണം ചെയ്ത് ലാഭമുണ്ടാക്കുകയും ചെയ്യുന്നതായി രഹസ്യാന്വേഷണ റിപ്പോർട്ടുകൾ ലഭിച്ചതിനെ തുടർന്നാണ് അധികൃതർ അന്വേഷണം ആരംഭിച്ചത്.
പബ്ലിക് അതോറിറ്റി ഫോർ മാൻപവറിൻ്റെ ആഭ്യന്തര തൊഴിലാളി വിഭാഗവുമായി സഹകരിച്ച് രൂപീകരിച്ച സുരക്ഷാ ടാസ്‌ക് ഫോഴ്‌സ്, പബ്ലിക് പ്രോസിക്യൂഷൻ്റെ അനുമതിയോടെ സ്ഥാപനത്തിൽ റെയ്ഡ് നടത്തി.
ഓഫീസിലെ താമസസ്ഥലത്ത് നിന്ന് ഏഷ്യൻ രാജ്യക്കാരായ 29 വനിതാ തൊഴിലാളികളെ അധികൃതർ രക്ഷപ്പെടുത്തി.റെയ്ഡിൽ രസീതുകൾ, സാമ്പത്തിക രേഖകൾ, തയ്യാറാക്കി വെച്ച കരാറുകൾ തുടങ്ങിയ തെളിവുകൾ പിടിച്ചെടുത്തു.
വൻ തട്ടിപ്പ്:
ഓഫീസ് ഓരോ വിസയ്ക്കും KD 120 ആണ് ഈടാക്കിയിരുന്നതെങ്കിലും, ഈ തൊഴിലാളികളുടെ കരാറുകൾ ഔദ്യോഗിക സർക്കാർ ഫീസുകൾക്ക് പുറമെ KD 1,100 നും KD 1,300 നും ഇടയിലുള്ള ഭീമമായ തുകയ്ക്കാണ് വിൽക്കുകയായിരുന്നെന്ന് രേഖകൾ വ്യക്തമാക്കുന്നു. നിയമവിരുദ്ധമായി തൊഴിലാളികളെ ചൂഷണം ചെയ്ത സംഭവത്തിൽ പ്രതികൾക്കെതിരെ തുടർനടപടികൾ ആരംഭിച്ചു.
കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/JwjTxtP7SMiEbr9IDkTJiK?mode=ems_copy_c
ഉദ്ഘാടനം കഴിഞ്ഞിട്ട് രണ്ട് ദിവസം മാത്രം, കുവൈറ്റിലെ ഈ ബീച്ചിന്റെ ഇപ്പോഴത്തെ അവസ്ഥ
പുതുതായി തുറന്ന ഷുവൈഖ് ബീച്ചില്‍ നിന്ന് നിരാശാജനകമായ കാഴ്ച. മനോഹരമായി വിഭാവനം ചെയ്ത പദ്ധതിയില്‍ കാണാനായത് മാലിന്യക്കൂമ്പാരങ്ങളാണ്. ബുധാഴ്ച ഔദ്യോഗികമായി ഉദ്ഘാടനം കഴിഞ്ഞ ബീച്ചില്‍ രണ്ട് ദിവസങ്ങള്‍ പിന്നിടുമ്പോള്‍ പല ഭാഗങ്ങളിലും മാലിന്യങ്ങള്‍ നിറഞ്ഞിരിക്കുകയാണ്. സോഷ്യല്‍ മീഡിയയിലൂടെയാണ് ഇത് വ്യക്തമാക്കുന്ന ചിത്രങ്ങള്‍ പ്രചരിക്കുന്നത്. മുനിസിപ്പൽ കാര്യ സഹമന്ത്രിയും ഭവന നിർമാണ സഹമന്ത്രിയുമായ അബ്ദുല്ലത്തീഫ് അൽ-മിഷാരി, കാപിറ്റൽ ഗവർണർ ശൈഖ് അബ്ദുല്ല സാലിം അൽ-അലി അൽ-സബാഹ് എന്നിവർ ചേർന്നാണ് ബുധനാഴ്ച ഷുവൈഖ് ബീച്ച് ഉദ്ഘാടനം നിർവഹിച്ചത്. കുവൈത്ത് സിറ്റിയുടെ ഹൃദയഭാഗത്ത് 1.7 കിലോമീറ്റർ നീളത്തിൽ ഒരുക്കുന്ന ഈ പുതിയ കടൽത്തീരം, വിനോദത്തിനും കായിക ആവശ്യങ്ങൾക്കുമുള്ള ഒരു സമഗ്ര കേന്ദ്രമാണ്. ഉദ്ഘാടനച്ചടങ്ങിൽ സംസാരിച്ച മന്ത്രി അൽ-മിഷാരി, രാജ്യത്തുടനീളം ബീച്ചുകളും പൊതു ഇടങ്ങളും വികസിപ്പിക്കുന്നതിനുള്ള വിശാലമായ ശ്രമങ്ങളുടെ തുടക്കം കുറിക്കുന്ന പ്രധാന നാഴികക്കല്ലാണ് ഈ പദ്ധതിയെന്ന് എടുത്തുപറഞ്ഞു. പൊതു ഇടങ്ങളെ സജീവമാക്കുന്നതിലും താമസക്കാരുടെ ആവശ്യങ്ങൾ നിറവേറ്റുന്നതിലും ഈ പദ്ധതി വഹിക്കുന്ന പങ്ക് അദ്ദേഹം ഊന്നിപ്പറഞ്ഞു.
കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/JwjTxtP7SMiEbr9IDkTJiK?mode=ems_copy_c
യാത്രക്കാർക്ക് സന്തോഷവാർത്ത; ഇനി ക്യൂ നിൽക്കേണ്ട; ഇന്ത്യൻ വിമാനത്താവളങ്ങളിൽ ഇ-അറൈവൽ കാർഡ് പ്രാബല്യത്തിൽ
ഇന്ത്യൻ വിമാനത്താവളങ്ങളിലെ ഇമിഗ്രേഷൻ നടപടിക്രമങ്ങൾ ഇനി മുതൽ കൂടുതൽ വേഗത്തിലും ലളിതമായും. പരമ്പരാഗതമായ പേപ്പർ ഡിസെംബാർക്കേഷൻ കാർഡിന് പകരം ഡിജിറ്റൽ ഇ-അറൈവൽ കാർഡ് സംവിധാനം ഒക്ടോബർ 1 മുതൽ പ്രാബല്യത്തിലായി. വിദേശ പൗരന്മാർക്ക് ഇമിഗ്രേഷൻ ക്ലിയറൻസ് വേഗത്തിൽ പൂർത്തിയാക്കുക ലക്ഷ്യമിട്ടാണ് ഈ മാറ്റം. യാത്രക്കാർ ഇന്ത്യയിലേക്ക് പുറപ്പെടുന്നതിന് 72 മണിക്കൂർ മുൻപും 24 മണിക്കൂറിനുള്ളിലും ബ്യൂറോ ഓഫ് ഇമിഗ്രേഷൻ വെബ്സൈറ്റ് വഴി ഇ-അറൈവൽ കാർഡ് പൂരിപ്പിച്ച് സമർപ്പിക്കണം. ഈ നടപടിക്രമത്തിന് ഫീസില്ല. കാർഡ് മുൻകൂട്ടി പൂരിപ്പിക്കാത്തവർക്ക് വിമാനത്താവളത്തിൽ ഇമിഗ്രേഷൻ നടപടികൾക്കായി കൂടുതൽ സമയം കാത്തിരിക്കേണ്ടിവരുമെന്ന് എമിറേറ്റ്സ് എയർലൈൻസ് അറിയിച്ചു.
പാസ്‌പോർട്ട് നമ്പർ, ദേശീയത, സന്ദർശന ലക്ഷ്യം, ഇന്ത്യയിലെ വിലാസം, ബന്ധപ്പെടാനുള്ള വിവരങ്ങൾ തുടങ്ങി അടിസ്ഥാന വിവരങ്ങളാണ് ഓൺലൈൻ ഫോമിൽ ആവശ്യമായിരിക്കുന്നത്. രേഖകൾ അപ്‌ലോഡ് ചെയ്യേണ്ടതില്ല. ഇന്ത്യൻ പൗരന്മാരെയും ഒസിഐ കാർഡ് ഉടമകളെയും ഈ സംവിധാനത്തിൽനിന്ന് ഒഴിവാക്കിയിട്ടുണ്ട്. യുഎഇ ഉൾപ്പെടെ ഇന്ത്യയിലേക്ക് ഏറ്റവും കൂടുതൽ യാത്രക്കാരെ അയക്കുന്ന രാജ്യങ്ങളിലെ ട്രാവൽ ഏജൻസികൾ പുതിയ നീക്കത്തെ സ്വാഗതം ചെയ്തു. “യാത്രക്കാരുടെ സമയം ലാഭിക്കാൻ സഹായിക്കുന്ന സുപ്രധാന മാറ്റമാണിത്” എന്നാണ് അവരുടെ അഭിപ്രായം. യാത്ര പുറപ്പെടുന്നതിന് 24 മണിക്കൂർ മുൻപ് ഓൺലൈനായി ഫോം പൂർത്തിയാക്കാനാകുന്നതോടെ, യാത്രക്കാർ വിമാനത്തിൽ കയറുന്നതിനുമുമ്പ് തന്നെ അവരുടെ വിവരങ്ങൾ ഇമിഗ്രേഷൻ കൗണ്ടറിൽ ലഭ്യമാകും. ഇതോടെ വിമാനത്താവളത്തിൽ അറൈവൽ കാർഡ് പൂരിപ്പിക്കേണ്ട സമയം ഒഴിവാക്കാനാകും. പേപ്പറിൽ നിന്ന് ഡിജിറ്റലിലേക്കുള്ള ഈ മാറ്റം നടപടിക്രമങ്ങൾ ലളിതമാക്കുകയും തിരക്കേറിയ ഇന്ത്യൻ വിമാനത്താവളങ്ങളിലെ നീണ്ട നിരകൾ ഒഴിവാക്കാൻ സഹായിക്കുകയും ചെയ്യുമെന്ന് വ്യവസായ വിദഗ്ധർ വിലയിരുത്തുന്നു.
കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/JwjTxtP7SMiEbr9IDkTJiK?mode=ems_copy_c
വ്യാജമായി വിദേശ ബ്രാന്റ് മദ്യങ്ങൾ നിർമ്മിച്ചു; കുവൈത്തിൽ പ്രവാസി വനിത അറസ്റ്റിൽ
കുവൈത്തിൽ പ്രമുഖ വിദേശ ബ്രാന്റ് മദ്യങ്ങൾ വ്യാജമായി നിർമ്മിച്ച പ്രവാസി വനിത അറസ്റ്റിൽ. ഏഷ്യൻ വനിതയാണ് അറസ്റ്റിലായത്. മഹബൂലയിലെ ഫ്‌ളാറ്റിൽ നിന്നാണ് ഇവർ അറസ്റ്റിലായതെന്ന് സുരക്ഷാ ഉദ്യോഗസ്ഥർ അറിയിച്ചു. ഖൈത്താൻ ക്രിമിനൽ ഇൻവെസ്റ്റിഗേഷൻസ് വിഭാഗമാണ് ഇവരെ അറസ്റ്റ് ചെയ്തത്. വിതരണത്തിനു തയ്യാറായ വിവിധ വിദേശ ബ്രാണ്ടുകളുടെ പേരിലുള്ള 300 ഓളം മദ്യ കുപ്പികളും നിർമ്മാണത്തിനായി ഉപയോഗിക്കുന്ന ഉപകരണങ്ങളും ഇവരുടെ പക്കൽ നിന്നും പിടിച്ചെടുത്തു. മദ്യ നിർമ്മാണ, വ്യാപാര മേഖലയിലെ അവരുടെ പ്രവർത്തനങ്ങളുടെ സ്വഭാവം, എത്ര കാലമായി ഈ കുറ്റകൃത്യം ചെയ്തു വരുന്നു,, മദ്യ നിർമ്മാണത്തിനുള്ള വസ്തുക്കൾ എങ്ങനെ ലഭിച്ചു എന്നിങ്ങനെയുള്ള വിവരങ്ങൾ അന്വേഷണ സംഘം ഇവരിൽ നിന്ന് ശേഖരിച്ചു. മദ്യവിൽപ്പന സംബന്ധിച്ച് അധികൃതർക്ക് രഹസ്യ വിവരം ലഭിച്ചിരുന്നു. ഇതിന്റെ അടിസ്ഥാനത്തിലായിരുന്നു അന്വേഷണ ഉദ്യോഗസ്ഥർ ഇവരുടെ താവളത്തിൽ പരിശോധന നടത്തിയത്.
കുവൈത്തിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാകൂ https://chat.whatsapp.com/JwjTxtP7SMiEbr9IDkTJiK?mode=ems_copy_c
Comments (0)