യുഎഇയിലെ സ്ഥാപനങ്ങളുടെ ക്രെഡിറ്റ് സ്കോർ നിശ്ചയിക്കുന്ന രീതിയിൽ ഇത്തിഹാദ് ക്രെഡിറ്റ് ബ്യൂറോ സമഗ്രമായ മാറ്റങ്ങൾ നടപ്പിലാക്കി. ഇനിമുതൽ ബാങ്ക് വായ്പകളുടെ തിരിച്ചടവ് ചരിത്രം മാത്രം നോക്കിയല്ല ഒരു കമ്പനിയുടെ സാമ്പത്തിക വിശ്വാസ്യത കണക്കാക്കുന്നത്. മറിച്ച്, ആ സ്ഥാപനത്തിന്റെ എല്ലാവിധ സാമ്പത്തിക-നിയമപരമായ പ്രവർത്തനങ്ങളും ക്രെഡിറ്റ് റിപ്പോർട്ടിൽ കൃത്യമായി രേഖപ്പെടുത്തും. വിദേശമന്ത്രാലയം, മാനവ വിഭവശേഷി സ്വദേശിവൽക്കരണ മന്ത്രാലയം, അബുദാബി പെൻഷൻ ഫണ്ട് തുടങ്ങിയ സർക്കാർ ഏജൻസികളിൽ നിന്നുള്ള വിവരങ്ങൾ ശേഖരിച്ചാണ് പുതിയ സ്കോറിംഗ് രീതി നടപ്പിലാക്കുന്നത്.

ജീവനക്കാർക്ക് ശമ്പളം നൽകുന്നതിൽ വരുത്തുന്ന കാലതാമസം ഇനിമുതൽ കമ്പനികൾക്ക് വലിയ തിരിച്ചടിയാകും. കൃത്യസമയത്ത് ശമ്പളം വിതരണം ചെയ്തില്ലെങ്കിൽ അത് ക്രെഡിറ്റ് സ്കോറിനെ നേരിട്ട് ബാധിക്കുകയും ബാങ്ക് വായ്പകൾ ലഭിക്കുന്നത് തടസ്സപ്പെടുത്തുകയും ചെയ്യും. ഇതിനുപുറമെ ഗതാഗത കുറ്റകൃത്യങ്ങൾക്കുള്ള പിഴകൾ, തൊഴിൽ നിയമലംഘനങ്ങൾ മൂലമുള്ള തുകകൾ എന്നിവ അടയ്ക്കാതിരിക്കുന്നതും സ്കോർ കുറയാൻ കാരണമാകും. സ്വദേശി ജീവനക്കാരുടെ പെൻഷൻ വിഹിതം കൃത്യമായി നൽകാത്തതും നിശ്ചിത സ്വദേശിവൽക്കരണ ലക്ഷ്യങ്ങൾ കൈവരിക്കാത്തതും കമ്പനികളുടെ റിപ്പോർട്ടിൽ വിപരീത ഫലമുണ്ടാക്കും.

ഡിജിറ്റൽ പരിവർത്തനത്തിലൂടെ തൊഴിൽ വിപണിയിൽ കൂടുതൽ സുതാര്യത കൊണ്ടുവരാനാണ് യുഎഇ ഈ മാറ്റത്തിലൂടെ ലക്ഷ്യമിടുന്നത്. ശമ്പളവിതരണം വൈകുന്നത് ക്രെഡിറ്റ് സ്കോറിനെ ബാധിക്കുമെന്നതിനാൽ സ്ഥാപനങ്ങൾ സമയബന്ധിതമായി വേതനം നൽകാൻ നിർബന്ധിതരാകും. ഇത് തൊഴിലാളികൾക്ക് വലിയ ആശ്വാസമാണ് നൽകുന്നത്. വരും ദിവസങ്ങളിൽ സാമ്പത്തിക ഇടപാടുകൾക്കൊപ്പം തന്നെ നിയമപരമായ ഓരോ നീക്കങ്ങളിലും സ്ഥാപനങ്ങൾ അതീവ ജാഗ്രത പാലിക്കേണ്ടി വരുമെന്ന് ഉറപ്പാണ്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt

‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും

ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.

ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്‌റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/DfsJVtpVohVHb4aFdLbW46?mode=wwt