യുഎഇയുടെ സാമൂഹിക സുസ്ഥിരതയും സാംസ്കാരിക മൂല്യങ്ങളും കാത്തുസൂക്ഷിക്കുന്നതിനായി 2026-നെ ‘ഇയർ ഓഫ് ഫാമിലി’ ആയി യുഎഇ പ്രസിഡന്റ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ പ്രഖ്യാപിച്ചു. കുടുംബാംഗങ്ങൾ തമ്മിലുള്ള ബന്ധം ശക്തിപ്പെടുത്തുന്നതിനും വരുംതലതലമുറയെ മൂല്യബോധമുള്ളവരായി വളർത്തുന്നതിനുമാണ് ഈ വർഷം ഊന്നൽ നൽകുന്നത്. ‘ഐക്യത്തോടെ വളരാം’ എന്ന പ്രമേയത്തിലാണ് 2026-ലെ ആഘോഷങ്ങളും പദ്ധതികളും ആവിഷ്കരിച്ചിരിക്കുന്നത്. രാജ്യത്ത് വസിക്കുന്ന സ്വദേശികൾക്കും വിദേശികൾക്കും ഒരുപോലെ പ്രയോജനപ്പെടുന്ന രീതിയിലാണ് ഈ സംരംഭം വിഭാവനം ചെയ്തിരിക്കുന്നത്.
തിരക്കുപിടിച്ച ജീവിതത്തിനിടയിൽ കുടുംബാംഗങ്ങൾ തമ്മിലുള്ള ആശയവിനിമയം മെച്ചപ്പെടുത്താനും ഒരുമിച്ച് സമയം ചെലവഴിക്കാനുമുള്ള പ്രത്യേക പരിപാടികൾ ഈ വർഷം ഉടനീളം സംഘടിപ്പിക്കും. ‘റൂട്ട്സ്’, ‘ബോണ്ട്സ്’, ‘ബ്രാഞ്ചസ്’ എന്നീ മൂന്ന് പ്രധാന തൂണുകളിലായാണ് പദ്ധതികൾ നടപ്പിലാക്കുക. പാരമ്പര്യ മൂല്യങ്ങൾ സംരക്ഷിക്കുക, കുടുംബ ബന്ധങ്ങൾ ദൃഢമാക്കുക, ഭാവി തലമുറയുടെ വളർച്ച ഉറപ്പാക്കുക എന്നിവയാണ് ഇതിലൂടെ ലക്ഷ്യമിടുന്നത്. ജോലിസ്ഥലങ്ങളിൽ കുടുംബത്തിന് കൂടുതൽ പരിഗണന നൽകുന്ന രീതിയിലുള്ള ഫ്ലെക്സിബിൾ വർക്കിംഗ് നയങ്ങൾ പ്രോത്സാഹിപ്പിക്കാനും ഇതിലൂടെ സാധിക്കും. കൂടാതെ കുടുംബാംഗങ്ങൾക്കിടയിലെ മാനസികാരോഗ്യം മെച്ചപ്പെടുത്തുന്നതിനും കുട്ടികൾക്കും മുതിർന്നവർക്കും ആവശ്യമായ പിന്തുണ നൽകുന്നതിനും പ്രത്യേക സംവിധാനങ്ങൾ പ്രാബല്യത്തിൽ വരും.
യുഎഇയെ സ്വന്തം വീടായി കാണുന്ന പ്രവാസി കുടുംബങ്ങൾക്കും ഈ പദ്ധതിയുടെ ഭാഗമാകാൻ സാധിക്കും എന്നത് ശ്രദ്ധേയമാണ്. സ്കൂളുകൾ, കമ്മ്യൂണിറ്റി സെന്ററുകൾ, തൊഴിലിടങ്ങൾ എന്നിവിടങ്ങളിൽ കുടുംബങ്ങളെ ഒന്നിപ്പിക്കുന്ന വിവിധ പരിപാടികൾ 2026-ൽ ഉടനീളം നടക്കും. കുടുംബാംഗങ്ങൾ തമ്മിലുള്ള സ്നേഹവും ഐക്യവുമാണ് ഒരു ശക്തമായ രാജ്യത്തിന്റെ അടിത്തറയെന്ന് ഈ പ്രഖ്യാപനത്തിലൂടെ യുഎഇ ലോകത്തിന് സന്ദേശം നൽകുന്നു. കുടുംബങ്ങൾക്കായി കൂടുതൽ ആനുകൂല്യങ്ങളും സാമൂഹിക പരിരക്ഷാ പദ്ധതികളും വരും മാസങ്ങളിൽ യുഎഇ സർക്കാർ പ്രഖ്യാപിക്കുമെന്നാണ് കരുതുന്നത്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുക https://chat.whatsapp.com/Dbf59JLetgBECJpr5UZOuZ?mode=gi_t
‘സ്ഫോടന ശബ്ദ’മുണ്ടാക്കുന്ന വാഹനങ്ങൾക്കെതിരെ യുഎഇയിൽ കർശന നടപടി; പിഴയും 12 ബ്ലാക്ക് പോയിന്റും
ജനവാസ മേഖലകളിൽ അർദ്ധരാത്രിയിൽ സ്ഫോടനത്തിന് സമാനമായ ശബ്ദമുണ്ടാക്കി ജനങ്ങളിൽ പരിഭ്രാന്തി സൃഷ്ടിക്കുന്ന വിധത്തിൽ നിയമവിരുദ്ധമായി രൂപമാറ്റം വരുത്തിയ കാറുകളുടെയും മോട്ടോർ സൈക്കിളുകളുടെയും യുഎഇ പോലീസ് കർശന നടപടികൾ ആരംഭിച്ചു. മേഖലയിലെ സംഘർഷാവസ്ഥ വാർത്തകളിൽ നിറഞ്ഞുനിൽക്കുന്ന സാഹചര്യത്തിൽ ഇത്തരം വാഹനങ്ങളിൽ നിന്നുണ്ടാകുന്ന ‘ബാക്ക് ഫയർ’ ശബ്ദങ്ങൾ പലരും മിസൈൽ ആക്രമണമോ സ്ഫോടനമോ ആണെന്ന് തെറ്റിദ്ധരിച്ച് ഭീതിയിലായിരുന്നുവെന്ന് അധികൃതർ വ്യക്തമാക്കി. എഞ്ചിനുകളിൽ മാറ്റം വരുത്തി ഉദ്ദേശപൂർവ്വം ശക്തമായ ശബ്ദമുണ്ടാക്കുന്നത് പ്രധാനമായും കൗമാരക്കാരും യുവാക്കളുമാണെന്ന് അന്വേഷണത്തിൽ കണ്ടെത്തിയതായി പോലീസ് അറിയിച്ചു. റിപ്പോർട്ട് ചെയ്യപ്പെട്ട ശബ്ദങ്ങൾ വാഹനങ്ങളിൽ നിന്നുള്ളതാണെന്നും രാജ്യത്തിന്റെ സുരക്ഷയെ ബാധിക്കുന്ന യാതൊരു ഭീഷണിയും നിലവിലില്ലെന്നും അധികൃതർ ജനങ്ങളെ ആശ്വസിപ്പിച്ചു. യുഎഇ പൂർണ്ണമായും സുരക്ഷിതമാണെന്നും പോലീസ് വ്യക്തമാക്കി.
ദുബായ്, ഷാർജ തുടങ്ങിയ എമിറേറ്റുകളിലെ ജനവാസ പ്രദേശങ്ങളിൽ രാത്രികാല പോലീസ് പട്രോളിംഗ് ശക്തമാക്കിയിട്ടുണ്ട്. യുഎഇ ട്രാഫിക് നിയമപ്രകാരം അമിത ശബ്ദമുണ്ടാക്കുന്ന വാഹനങ്ങൾ ഓടിക്കുന്നവർക്ക് 2000 ദിർഹം പിഴയും 12 ബ്ലാക്ക് പോയിന്റുകളും ലഭിക്കും. കൂടാതെ വാഹനം പോലീസ് പിടിച്ചെടുക്കുകയും ചെയ്യും. അനധികൃതമായി രൂപമാറ്റം വരുത്തിയ വാഹനങ്ങൾ തിരികെ ലഭിക്കാൻ 10,000 ദിർഹം വരെ ഫീസ് നൽകേണ്ടിവരുമെന്നും അധികൃതർ അറിയിച്ചു. ഈ നടപടി കർശനമായി നടപ്പാക്കുന്നതിന് ദുബായ് പോലീസ് ഓപ്പറേഷൻസ് അസിസ്റ്റന്റ് കമാൻഡർ-ഇൻ-ചീഫ് മേജർ ജനറൽ സെയ്ഫ് മുഹൈർ അൽ മസ്റൂയിയും ഷാർജ പോലീസ് സെൻട്രൽ റീജിയൻ ഡയറക്ടർ ബ്രിഗേഡിയർ ഖലീഫ അൽ ഖസൂനിയും നേതൃത്വമൊരുക്കുന്നുണ്ട്. കുട്ടികൾ വാഹനങ്ങളിൽ അനധികൃത മാറ്റങ്ങൾ വരുത്തുന്നില്ലെന്ന് മാതാപിതാക്കൾ ശ്രദ്ധിക്കണമെന്നും അധികൃതർ അഭ്യർത്ഥിച്ചു. ഇത്തരം ശബ്ദശല്യം ഉണ്ടാക്കുന്ന വാഹനങ്ങളെക്കുറിച്ച് ഔദ്യോഗിക ചാനലുകൾ വഴി പോലീസിനെ അറിയിക്കണമെന്നും പൊതുജനങ്ങളോട് നിർദേശിച്ചിട്ടുണ്ട്. മേഖലയിലെ നിലവിലെ സാഹചര്യം പരിഗണിച്ച് ജനങ്ങളുടെ സമാധാനവും സുരക്ഷയും ഉറപ്പാക്കുക എന്ന ലക്ഷ്യത്തോടെയാണ് ഈ നടപടികൾ ശക്തമാക്കിയതെന്നും പോലീസ് അറിയിച്ചു. പോലീസിന്റെ ഈ ഇടപെടലിനെ പ്രവാസികളും സ്വദേശികളും സ്വാഗതം ചെയ്തിട്ടുണ്ട്.യുഎഇയിലെ വാർത്തകളും തൊഴിൽ അവസരങ്ങളും അതിവേഗം അറിയാൻ വാട്സ്ആപ്പ് ഗ്രൂപ്പിൽ അംഗമാവുhttps://chat.whatsapp.com/Dbf59JLetgBECJpr5UZOuZ?mode=gi_t
